يافنجرى يابو بندقية

يافنجرى يابو بندقية--مين اللى زقك ع العملة دية
تعظيم سلام عشان اللى ماتوا
وجردل تفافة على التكية
كنت ف نظرنا مرة فارس
دلوقتى شبه العربجية
...يادوب قعدت شهور نسيت
تعظيم سلام الثورجية
وبنفس الدراع بقيت تشوح
وتقول علينا بلطجية
وهأقولك ايه-هيا نية
بس كلمة آخرانية
اللى عاش شريف ف عمره--مايموتش موتة عصبجية
وانت مت--أيوة مت-- ياخطيب الفنجرية

((منقول))

الأغلبيه الصامته

الأغلبيه الصامته ....؟؟∙ ... هي أغلبية صامته كما يقول البعض , وهذه هي نفس الأغلبيه الصامته التي لم تغير شيئا طيلة فترة حكم النظام السابق وكانت صامته .. ولم يفدنا صمتهم شيئا سوى المزيد من الذل والإهانه و السرقه والان تحولو الى معارضين ومهاجيمين لماذا لا أعرف ؟؟ الثورة قامت من أجل الشعب كله وفى الاساس كانت من أجل هذه الاغلبيه الصامته التى لم تعرف الا الذل والاهانه والسرقه !!!!

من يريد أن يغير ,, فليبدأ بإيصال صوته وخرق حاجز صمته ..... (منقول)

 والله هو اقتراح صعب بس مش مستحيل بس أكيد أكيد المجلس العسكرى مش هيقبل انا احنا اللي نختار وزير الداخليه,والخارجيه, والاعلام وخصوصا علاء الاسوانى ولو تسمحلى انا حابب ارشح الدكتور محمد غنيم لوزاره الصحه  وحمدى قنديل لوزاره الاعلام لانه شخصيه مقبوله اكتر بالنسبه للناس اللي قاعده في بيوتها بس أنا هقلك على حاجه موضوع اختيار الاسامى ده هوا اللي بيعمل مشاكل وانقسامات علشان الناس ما بتتفقش على حد ابدا

مذبحة التحرير

بسم الله الرحمن الرحيم



أن ما نراه اليوم من تناقض بخصوص مجريات الثوره وردود أفعال المجلس العسكرى  لهو شئ يفقد العقل وطبعا بما أني صاحب خيال مريض فأنا حبيت أضع ليكو تخيلي قد يكون مجنون أو مستحيل أو غريب ولكنه مجرد تخيل .

__________________________________________________

عند النظر للتاريخ .....

ظهر مكر ودهاء محمد على في تخطيطه لمذبحة القلعة عندما أراد أن يتخلص من المماليك :

أعد "محمد علي" مهرجانًا فخمًا بالقلعة دعا إليه كبار رجال دولته، وجميع الأمراء والبكوات والكشاف المماليك، فلبى المماليك تلك الدعوة وعدوها دليل رضاه عنهم، وقبل ابتداء الحفل دخل البكوات المماليك على محمد علي فتلقاهم بالحفاوة، ودعاهم إلى تناول القهوة معه، وشكرهم على إجابتهم دعوته، وألمح إلى ما يناله ابنه من التكريم إذا ما ساروا معه في الموكب، وراح محمد علي يتجاذب معهم أطراف الحديث؛ إمعانًا في إشعارهم بالأمن والود.

وتحرك الموكب ليغادر القلعة، فسار في طريق ضيق نحو باب "العزب"، فلما اجتاز الباب طليعة الموكب ووالي الشرطة والمحافظ، أُغْلِق الباب فجأة من الخارج في وجه المماليك، ومن ورائهم الجنود الأرناؤود، وتحول الجنود بسرعة عن الطريق، وتسلقوا الصخور على الجانبين، وراحوا يمطرون المماليك بوابل من الرصاص،  حتى امتلأ فناء القلعة بالجثث، ولم ينج من المماليك الأربعمائة والسبعين الذين دخلوا القلعة في صبيحة ذلك اليوم إلا واحد فقط .
___________________________________________________________
طبعا أى واحد متوقع أني أقصد أن الجيش هيموت الناس اللى فى الميدان يبقى "أهطل وساذج" ولا مؤخذه يعني.
بس ليه أنا مش عارف أن المجلس العسكرى بيحاول يستدرج الناس للميدان زي بالظبط ما كان محمد على استدرج المماليك للقلعه في دلالات كتيره على كده منها :-
1-أحداث مسرح البالون وما يحوم حولها من علامات استفهام خصوصا عوده الشرطه للتعامل العنيف مع المتظاهرين وما تم من استفزازت أمام الكاميرات كأنهم يقولون ها نحن موجودن وبقوتنا كاعلان للتحدى . 
2-صدور حكم آخر بإخلاء سبيل‏7‏ ضباط بينهم مدير أمن السويس. وهؤلاء الضباط متهمون بقتل30 شهيدا وسقوط المئات من المصابين. http://t.co/U4PXwtS
3- قضت محكمة جنايات السويس المنعقدة بالتجمع الخامس، بعدم جواز نظر الاستئناف المقدم من النيابة العامة علي قرار إخلاء سبيل مدير أمن السويس والضباط الـ7 المتهمين بقتل الثوار وتأييد قرار إخلاء سبيلهم.
 http://www.rosaonline.net/Daily/News.asp?id=117686

وكأن المجلس العسكرى بيقولنا اخبطو راسكو فى الحيط طبعا أى حد هيقولى أمر قضائى هقوله في "فى هذه الفتره العصيبه التى تمر بها البلاد مفيش أى حد له كلمه فى أى حاجه أو قرار فى مصر فى الوقت الحالى غير المجلس العسكرى"
4-براءه أنس الفقى والافراج عن أسامه الشيخ http://t.co/eK0ttyK
كل ده غير المحاكمات العسكرية للمدنين ,تأجيل القضايا لفترات طويله وغيره وغيره .
بس كل ده ما يفرقش معايا في حاجه غير حاجة واحده بس أن كل ده حصل فى أسبوع واحد والمشكلة الكبيره أن أساسا الناس مشحونه ليوم 8 يوليو ده جامد وهو زي ما يكون بيشحنهم كمان زي ما يكون المجلس العسكري عاوز يوم 8 يوليو ينجح .
كل أيام المليونات كانت دايما بتطلع قرارت ترضيه وجرعات تهدئه لغضب الناس على عكس الجمعه دي بذات .
طيب " لـــــــــــــــــــــــــــــــــــــــيـــــــــــــــــــــــــــــــــــه " ؟
فى شويه احتمالات مريضه كدا يعني من عندى :-
1- بما أن الفريق سامى عنان محبوب جدا عند أمريكا يمكن يكون ده مخطط للاطاحه بالمشير وتسليم السلطه المؤقته لسامى عنان عن طريق توصيل الناس لحاله من الغضب تجعلهم يتحدون المشير بقوى عن طريق اعتصام ويكون الحل السحرى حينئذ هو الأطاحه بالمشير وتسليم السلطه لنائبه ويطلع بقى الاعلامين بصوت عالى أنتو لسه عايزين آيه حرام عليكو هتخربو البلد والكلام اللي أنتو عارفينو ده آلخ.............
2-ممكن يكون المجلس العسكرى بيراهن على جمعه 8 يوليو دى بحيث أن يبقى التواجد ضعيف وبالتالى يعرف المتاظهرين أن هما ملهومش أنصار وبالتالى يدمر نفسيتهم .
3- قد يكون المجلس العسكرى يريد تمديد الفتره الانتقاليه حتى يتمكن من السيطره والتغلغل فى شئون الدوله بشكل يتيح له امساك زمام الأمور فى حاله وصول رئيس للدوله يكون غير مستحب من قبلهم ويكون التمديد عن طرق إعاده التظاهر لفتره ومن ثم يتطلب هذا تأجيل الانتخابات البرلمان والرئاسه من دون أن يبدو هما فى الصوره .
"والاحتمالات دى قد تكون بمثابه مذبحه التحرير "
طبعا فى ناس ممكن تتضحك من الكلام الاهبل ده ولكن أعضاء المجلس العسكرى أشخاص لايستهان بقدرتهم التخطيطه فهؤلاء الأشخاص ليسو مجموعة من المتعجرفين أمثال "جيمى وشلته" أو الجهلاء المتغطرسين "أمثال حسنى وأتباعه" وأنما هولاء قاده عسكريين عملهم فقط التخطيط للحروب سواء على المدى البعيد أو القريب أعتقد أن أكبر تضليل هو أن نظن أن هولاء الأشخاص لايعلمون ماذا يفعلون فأنا عندى آعتقاد شخصى أن كل شئ تم منذ اللحظه التى تم فيها اعلان انعقاد المجلس العسكرى بصفه مستمره حتى لحظتنا هذه مخطط ومرسوم بالورقه والقلم ولا يوجد به أشياء محض الصدفة غير بعض الاحداث الفرديه التى ارتكبها ضباط الشرطه .
فلا يجب أن ننسى كيف كانت تحدث أحداث فتنه دائما بين المسيحين والأقباط وأحدات قنا وحرق الكنائس وتكسيرها وكاميليا وكريستين وعبير "آلخ.....  كان دائما بطل هذه الأحداث والفارس المنقذ هو المجلس العسكرى وكذلك ترسيخ مبدأ المؤمراه لدى أفراد الشعب وبالتالى كانت الناس دائما تطلب منهم الضرب بيد من حديد ودائما كان استخدامهم للقسوه مبرر على عكس الشرطه
وكان هذا يجعل منهم أبطال أكثر .
ولكن :-
احقاقا للحق وليس أكثر لابد أن نفترض كون المجلس العسكري قد يكون يتصرف بهذه الطريقه الغريبه "بنيه حسنه"
حيث انه بالتأكيد خاضع لضغوط خارجيه بشكل كبير وربما يرى أن الحل للخروج منها هو "وجود ضغوط داخليه أكبر" .
وبالطبع بما أن لاأحد يعلم الغيب غير الله سبحانه وتعالى فأنا أحاول فقط وضع تصورات خياليه لاعلاقه لها بالواقع القادم وانما هى مجرد افتراضات بناءا على التطورات الحادثه فى وقتنا هذا .
_______________________________________________________________
وأنا أحب أنهى كلامى برؤيه متفائله عن الثوره حيث أن :
الساعه لاتعود الي الخلف ابدا وبالتاكيد القادم مهما كان سئ فلن يكون اسواء من عهد حسنى مبارك بـأى شكل من الأشكال .
أيضا كل تلك الافتراضات السيئه لا يمكن تحقيقها الا اذا تخلى الثوار عن الثوره طالما أن أهل الثوره يدافعون عنها فلن تسرق أبدا
وبالتاكيد اذا نجح اعتصام 8 يوليو قد تكون هذه هى القشه التى قسمت ظهر البعير والتى تؤدى إلي نجاح الثورة بشكل كامل .
وشكرا وأرجو ترك الملاحيظ على أى خط قد أكون وقعت به .

يوم لذيذ

في يوما ما بينما كنت جالسا علي الماي كمبيوتر بتاعي امبارح يعني ...
المهم: جالي انفيت لايفينت بينما القي نظره لأري ما هو الايفينت وجدت 6 أبريل المنصوره بعتالي دعوه علشان احضر وقفه صامته أدام المحافظه بصفتي طبعا لاعب ناشئ في 6 ابريل طبعا رحت اول ما وصلت لقيتهم شيلوني لوحه وقالولي ايه اقف بص للناس طبعا كان شعور فشيخ مش هقولكو عليه يعني .
طبعا انا واقف ساعه ونص ماسك لوحه فقعدت أتأمل بقي في الناس اللي رايحه واللي جايه واصطدمت فعلا لأني لقيت ناس كتير مش طيقا نفسها ولا طيقانا وطبعا بما ان أنا ليا نظره متفحصه ومتحمصه هوصفلوكو الناس اللي أنا شوفتها............
دقون- منافضين - مكسوفين - مناضلين - السواقين والصنايعيه
1- الدقون : وهنا أنا مش قصدي الشيوخ بس قصدي أي واحد تلاقي دقنه طويله ومكسل يروح للحلاق وده طبعا بتلاقيه مركز اوي في اللي بيحصل ومتعرفش هوا مبسوط ولا زعلان بس تلاقيه متنح في اللوح اللي الناس شيلاها كدا .
2-المنافضين : ودي بقي الناس اللذيذه اللي أساسا مش شيفينا ودوا معظمهم بيبقي الشباب المفتح الجاهز اللي الدنيا مش فيتا عليه.
3-المناضلين : ودول بقي عمله نادره بصراحه يعني قليل أوي لما تلاقي واحد يشجعك كدا ويكون مؤمن باللي أنته بتعمله وفي طبعا ناس مناضلين علي استحياء كده زي ما يكون خايف يجي جمبك كدا وقولك ايه هو انته وقفين ليه يا شباب  تقعد تتكلم معاه تلاقيه بيحاول يسحب نفسه منك كده ويقوم قايل بصوت واطي أوي ربنا يحميكو ياشباب ويقوم خالع بسرعه.
4-السواقين والصنايعيه : ودول بقي ناس مش فضيالنا وطبعان مش عاجبهم الناس اللي واقفه دي وبيقعدو يستهزأو بيهم فيما بينهم وبين بعض وطبعا لازم يرمي افااا لذيد كدا وهو معدي لازوم التفتيح يعني .
وطبعا في فئه كمان بس دول بقي الابطال أو بمعني أصح كبار الفلووووول ودول فئه كل من تعدي +60 عام وده بقي تحس انه عايز ينزل من عربيته وهوا ماشي يمسك في خناق الناس اللي واقفه بغض النظر هما واقفين ليه هووا اتربي علي كدا بيمشي يقعد يلعن ويسب  في أم الثوره وقاعد بقي شغال أنتو بوظنو البلد انته فيكو انتو عليكو وده أحسن طريقه تتعامل معاه بيها انك تخلع من وشوه أو ما تبصلوش خالص علي ما يعدي .
بس بكل صراحه ويمكن ناس كتير ميعجبهاش الكلام بس الناس دي كلها مش مهمه وملهاش دور ولا في ايديها تقدم ولا تأخر ولو الناس اللي في تحرير كانو سمعو كلامهم مكنش مبارك مشا اساسا .......
الناس دي تقدر تقول عليها الشريك المخالف كل هدفه ان هوا يعترض علي اي حد يعترض بغض النظر من صح ومين غلط....
ولكن.....
الناس دي ساعه الجد بتلاقيه اول ناس تقف وتسد يعني هما مش عاجبهم الناس تتظاهر بس لو حصل حاجه في المظاهرات تلاقيهم أول من وقف .
يمكن يكون رأيي غلط بس أنا شايف ان الناس دي لسه مش عارفه مين الصالح من الطالح لحد الوقتي ومحتاجين توجيه يعني من الاخر عايزين حد يمشوا وراه علشان هما لحد دلوقتي مش قادرين يعرفو ايه النظام يعني يمشو ورا المجلس العسكري ولا ورا السباب اللي وقفو حال البلد وعطلوه الاستثمار والسياحه شيلاه يا استثمار يعني.
 لو كل واحد ركز هيلاقي كل القنوات شغاله طول اليوم (قرر المجلس العسكري بقياده سياده المشير - تم مش عارف ايه بتوجيهات سياده المشير - الجيش حامي الثوره - الجيش خط اسمر قصدي أحمر  - ألخ.......
وطبعا كل القنوات شغال بقي علي الناس اللي في التحرير ( بلطجيه - مخربين - مندسين -محرضين  - أما بالنسبه للاجندات والقله المندسه فالاخوان المسلمين قايمين بالواجب علي أكمل وجه  والحاج كنتاكي خلاص اتخرب بيته لما الحكومه كسرتله المحل باسم الثوره يوم الثلاثاء اللي فات متقلقوش منه يعني .
بالتالي الناس لازم تسمع كلام الابطال اللي هما العسكر يعني اللي حمو الثوره وينفضو للمندسين والمحرضين والبلطجيه  علشان كدا بقولكو الناس دي مش مهمه ولازم الثوار ينفضلوهم علشان دول بيمشو علي السمع واللي صوته عالي هوا اللي بيكسب والثوار صوتهم ما بيعلاش الا في الميدان.
يعني من الاخر لكل واحد مش عاجبه الناس اللي بتتظاهر الناس بتوع العجله بتوع الاستقرار هقولكو حاجه واحده بس لولا الناس اللي اتظهرت وباتت في الميدان كان زمانكو خرس صوتكو مش بيطلع ولو كانت الناس سمعت كلامكم بعد الخطاب بتاع حسني مبارك كان زمان مصر كلها راحت في داهيه فياريت تستكوا شويه وبلاش تفرعنوا حد علي المصريين تاني......